مضايق..مخنوق..أروح لمين وأتكلم مع مين؟

إزاي نعرف إمتى نروح للدكتور النفسي أو نتكلم مع معالج نفسي أو نروح لشخص مختص بالتنمية ذاتية؟

أولا دعونا نتفق إن الصحة النفسية هى أحد المحركات الرئيسية في حياة الانسان. من غيرها إنت عامل زي العربية اللي الاربع عجلات بتوعها ضربوا. ومن المهم جدا إني أوضح في بداية المقال ده إن الطريقة إللي بيتعامل بيها المجتمع مع مفهوم الصحة النفسية يشوبه الكثير من التلف والجهل والهروب وإننا نستخبى ورا مظاهر إجتماعية ليست لها أي أساس أو علاقة بحالتنا النفسية لأنه عيب وميصحش ولأن المجتمع طول الوقت بيصدر لك إنه نقص

هل جربت تسأل نفسك إذا كان نفس المجتمع ده بيشوف دور البرد على إنه عيب أو بيعتبره ضعف، بالطبع لأ، إذن المجتمع بيتعامل مع الصحة الجسدية (ومش كلها) على إنها شئ ممكن لانها غذبن عنه بتبان ولكن لا يأبه على الاطلاق للصحة النفسية برغم إن الدراسات العلمية أثبتت إن سبب كبير من التداعي الجسدي سببه الصحة النفسية. وطبعا التداعي الجسدي والنفسي من أسبابه الرئيسية سوء إدارة الحياة من حيث الغذاء والروتين اليومي والعادات الصحية السيئة وسوء إدارة أو الجهل بإداراة مشاعرنا وإحتياجاتنا العاطفية واللي عادة بيؤدي بينا إلى مجموعة إختيارات في حياتنا تزيد من حالنا تعاسة ولا تساهم بشكل فعال وإيجابي في نفسيتنا وحياتنا. إضافة إلى نقص في العلم بالسلوكيات والمهارات الحياتية، على سبيل المثال محدش عَلمك في المدرسة أو البيت إزاي تداوي قلب مجروح أو إزاي تتعامل مع الناس اللي بتضايقك أو إزاي تحدد أهدافك وتنفذها برغم التحديات والكثير من المواضيع اللي بتدخل في نطاق السلوكيات بتؤثر تأثير مباشر في طريقة إدارتنا لحياتنا. بشكل أصح، إنت بتتعلم الحاجات بالويم وبالتجربة وبالصدفة وبتتخَبَط كام مرة لغاية ما توصل لمعادلة تريحك، بس عقبال ما توصل، هتكون مُحَمل بمشاكل نفسية أخرى من وقع التجارب، قد تكون لم تُدركها أو لم تستطيع معالجتها من غير التحدث مع شخص مختص

طبعا ده مش معناه إن لما تتعلم مهارات أو سلوكيات أو تتعلم علم نفس من وإنت صغير إنك مش هتتعرض لجرح أو ضيق، بس على الأقل هتتفادى تعقيدات كتيرة في العلاقات الإنسانية بداية من علاقتك بنفسك وهتقدر تفهم نفسك بشكل أكبر ومن هنا بتكون نقطة البداية المضيئة واللي بنعيش نشتغل عليها طول الوقت واللي من خلالها تقدر تدير علاقاتك بالآخرين وبالحياة بشكل يضمن لك قدر أكبر من الراحة.

طيب تعالوا نتعرف مع بعض في خطوات بسيطة إزاي نقدر نتعرف على حالتنا النفسية من حيث إننا نفرق بين نروح لمين ونتكلم مع مين، (وأخص بكلامي هنا عند الإشارة إلى دكتور أو معالج أو مختص تنمية ذاتية، الأشخاص المختصين اللي تم تدريبهم وتأهيلهم من قبل مؤسسات معترف بيها محليا أو دوليا فقط) :

- أولا، لازم تكون فاهم الفرق بين الدكتور النفسي  Psychiatrist والمعالج Psychotherapist ومدرب التنمية الذاتية   Life Coach، ويأتي الأول والثاني في مقام متقارب من حيث الاحتياج ويأتي الثالت في مقام أبعد في نوع الدراسة ويتشابه بعض الأحيان في الفلسفة المستخدمة. عندك مثلا المعالج النفسي ممكن جدا يبعتك للدكتور النفساني، ومدرب التنمية النفسية ممكن جدا يبعتك للمعالج. المعالج والدكتور النفسي ممكن  يفيدوك نفس الافادة طالما لم يتعلق الأمر بمرض نفسي وعقلي مزمن زي الشيزوفرينيا، الفصام وهكذا. وفي الحالات ديه يُفَضَل يكون التقرير الاساسي عن حالة المريض بإدارة دكتور نفسي، ولكن المعالج أيضا شخص هيكمل معاك الرحلة بعد ظبط الحالة ودخولها في مراحل العلاج، ويتابع معاك أدق التفاصيل

- التنمية الذاتية علم من علوم تدريب الانسان للوصول لحياة أفضل، وبتتعامل مع الناس اللي بيعانوا من Present blockage   في أمور معينة هما محتاجين يغيروها ومحتارين أو مش عارفين، ولكنه في المجمل الشخص اللي بيلجأ إلى مدرب التنمية الذاتية بيكون شخص عنده دافع قوي إنه عاوز حياته تبقى أحسن ومحتاج بس حد يساعده يفك الشفرة بتاعت المرحلة

- المعالج النفسي، هو شخص إتدرب على علم النفس ودرسه بعمق لمعالجة أي إنسان بيشتكي من حالة نفسية متردية، المعالج النفسي قد يكون بيرشح علاج دوائي وقد يكون لأ على حسب مدرسة علم النفس اللي بيتبع إعتماده لها. المعالج النفسي شخص تم تدريبه على التعامل مع أغلب الحالات. يلجأ إليه شخص حاسس بعَرَض نفسي عامل حالة بطء أو وقفة حال في حياته، زي مثلا إكتئاب وأعراضه، هلاوس، لخبطة نوم، وسواس قهري، أفكار إنتحارية، أفكار لتدمير الجسم أو إيذاء النفس، تعاطي المخدرات وهكذا. في بعض الحالات وفي مصر فقط بيطلق إسم معالج أحيانا على شخص لم يدرس علم نفس وإنما مر بنفس رحلة المريض وتعافى منها تماما، زي مثلا في حالة المدمنين المجهولين Narcotics Anonymous  والمعالج في هذه الحالة، شخص قادر تماما على إنه ينفع الحالة اللي بيتعامل معاها في أغلب الاحوال وببساطة بيتم تحويل أي حاجة لا يقوى على إنه يتعامل معاها إلى المعالج النفسي ذو الخلفية الأكاديمية أو الطبيب النفسي أيهما المختص بالحالة 

- بعض المعالجين هيرشح دواء علاجي والبعض الآخر هيحولك إلى دكتور نفسي يكتبه لك. وفي الحالتين المعالج المعتمد عنده القدرة التامة إنه يرشح لك دواء علاجي أو لأ، إلا إن بعض المعالجين بيختاروا أن لا ينتموا إلى مدرسة العلاج الدوائي، ولذا بيُترك الأمر إلى الدكاترة النفسانيين فيما يتعلق بالحالات اللي بتحتاج لعلاج دوائي

- الدكتورالنفساني، خريج طب ودرس دراسة جامعية لا تقل عن سبع سنين. وبيروحله نفس الشخص اللي بيروح للمعالج مع فارق إن الحالات الشديدة الوطأة بتبدأ من عنده أو بتتحول إليه من قِبل المعالج النفسي، ولكن ما إن بدأت رحلة العلاج فالمعالج بيكون مع الشخص اللي بيتعالج خطوة بخطة. في بعض الحالات المعالج النفسي بتكون مدة دراسته أقل ولا يعني ذلك أقل في العلم.

- ناخد في إعتبارنا أهمية إن كل من يتعامل مع الانسان وما يخص نفسيته يجب أن يكون شخص درس وتم إعتماد دراسته من جهة معترف بيها دوليا لأن الانسان من أغلى ما وهب الله إلى الحياة وبالتالي التعامل مع نفسيته مسئولية كبيرة، وأيضا مسئوليتك في البداية تجاه نفسك متى قررت الإختيار. النفس زي الكرار وبدون معرفة المفاتيح الصحيحة قد يؤدي التعامل معاها الى أذي غير مرغوب فيه. ويخضع كل من الطبيب النفسي والمعالج ومدرب التنمية الذاتية إلى رقابة ومتابعة مهنية وتطور دائم من قبل الجهات المعتمدة لضمان الاستفادة الخالصة لكل الناس اللي بتروح لهم وبتتعامل معاهم

- الدكتور النفساني والمعالج النفسي ومدرب التنمية الذاتية، مع اختلاف درجاتهم يجب أن يكونوا على إطلاع دائم بكل مجريات المجال بتاعهم، يعني من الآخر الناس ديه ناس بتذاكر على طول وبتلتزم باستمرارية التقدم العلمي والمهني مع استمرارية اكتساب الخبرات اللازمة. ولان المجالات ديه العلم لسه بيتوصل فيها إلى أسرار وبيتقدم في معرفة الاكتشافات الخاصة بأعظم إبداع على وجه الأرض وهو الانسان

- الدكتور النفسي والمعالج ومختص التنمية الذاتية بتحدد معاهم ميعاد وتحضر جلسة وعادة الجلسة بيتراوح قيمة الفيزيتا الخاصة بيها من 250 إلى 850 جنية. السؤال المهم هنا، هل لارتفاع تمن الفيزيتا علاقة بجودة الدكتور أو المعالج؟

في الحقيقة إرتفاع تمن الفيزيتا متعلق بنوع رسالة المختص اللي انت رايح له ومالوش علاقة بالجودة  إطلاقا، واقدر أقول بكل ثقة إن أعظم دكاترة في مصر الفيزيتا بتاعتهم مابتزيدش عن 250 جنية بالكتير لان عادة بتكون الرسالة عندهم مازالت محتفظة بانسانيتها و جوهرها الحقيقي. فيه بعض المختصين بيكونوا عاوزين يحددوا نوع الناس اللي يجيلهم ومن أنهي فئة اقتصادية وده من حقه طبعا برغم إنه قرر يمتهن مهنة لها رسالة إنسانية عميقة، والبعض الآخر بيكونوا مثلا عاملين عياداتهم في أماكن زي الزمالك والمعادي وبالتالي بيرفعوا الاجر، والبعض برضه بيتخيلوا إن الاعتمادات الدولية قيمتها أعلى من الاعتمادات المحلية، يعني مثلا دكتور خريج جامعة القاهرة غير دكتور خريج جامعة في أمريكا وهكذا وده مش صحيح لأن مش ذنبك تدفع تمن إختياره في العلام ومن الآخر إن لم يثقل العلم موهبة وشغف وعمل مستمر يبقى مفيش مقومات تانية تستحق التوقف أمامها لما تيجي تختار. ده إضافة إلى بعض الفئات في المجتمع اللي مازالت تؤمن بإن الغالي تمنه فيه! وده خطأ شائع للأسف في التعامل مع الدكاترة عموما. وكل العوامل ديه ليس لها أي علاقة بشطارة المختص إطلاقا. تاني وللتأكيد، إن العوامل الاساسية بالجودة مرتبطة بالشغف والوعي للدور الانساني والوعي التام بإن المختصين في المجال ده لازم يكون عندهم احساس عالي بالتفوق على أنفسهم طول الوقت من حيث الإلمام بالعلم وكل المستحدثات الخاصة بالمجال بتاعهم لخدمة الناس اللي بتلجأ لهم.

 

- مهم في نهاية حوارنا التأكيد على فكرة أهمية الصحة النفسية وأهمية إهتمامنا بيها. وإن وجود حد مختص تلجأ له بيحل المشكلة وبيلحقها بسرعة وبيديك فرصة أجمل إنك تستمتع بحياتك من غير تكدير ودوامات تلف فيها ومتعرفش تطلع. الأجمل إنك تاخد خطوة سريعة ومهمة تصحح الموقف اللي انت فيه. وعند إتخاذك الخطو ديه، تأكد إن المختص لازم يكون شخص في الأساس بيحمل رسالة إنسانية وإن مصلحته الأولى والأخيرة إن إنت بالأخص تحيا حياة أفضل كإنسان وتستمتع قدر الامكان بوقتك في الرحلة. سواء كان دكتور نفساني أو معالج نفسي أو مدرب تنمية ذاتية، فلزم الأمر أم يكون شخص أنت تراه شغوف جدا وموهوب في مهنته، والأهم إنك تكون بتستريح معاه وبتوصل إلى تقدم يتناسب مع حالتك

All content provided on the Mashouraa  and Mashoura-articles blogs are for informational purposes as part of my vision to serve the empowerment of humanity. The owner of these blogs is Ghada Sharif, a British trainer Coach, Mentor and Psychotherapist. All copyrights ©Mashouraa UK 2005. For inquiries and appointments, please email ghadasharif@gmail.com