إضطراب ما بعد الصدمة (أو الاضطراب العصبي ما بعد الصدمة) Post Stress Traumatic Disorder (PSTD)l

بمنتهى البساطة هو شعور بيجي للانسان فيما بعد تعرضه لصدمة.

تعريف الصدمة

التعريف المتعارف عليه والاكثر تقليدية هو المرور بصدمة من العيار التقيل زي التحرش والاغتصاب والعنف والحوادث والفقد. ولكن ما وصلت إليه آخر الابحاث العلمية هو إن تعريف الصدمة مرتبط بالانسان نفسه ونشأته وطريقة تربيته والبيئة اللي نشأ فيها وما ترتب على ذلك من قدرة على إدارة حياته وكل الأحداث المترتبة من تفاعله معاها. وبالتالي فالصدمة ممكن تكون أي حاجة بفرق شخص من التاني.

مثلا الطفل اللي عنده تلات سنين ممكن يكون في حالة صدمة لما يلاقي دبدوبه اللي ارتبط بيه لفترة طويلة وكان بياخده في حضنه وهو نايم اختفى أو ضاع. وطبعا مع اختلاف نوع الحدث والمرحلة العمرية بتختلف نوعية التأثر والتوابع للتأثر ده ومع إختلاف النشأة والتربية (وهى العوامل الاولية المؤثرة في تكوين طباع الانسان) بتختلف طريقة التعبير عن الصدمة.

الصدمة الخفية

زي ما الاسم بيقول، هى صدمة انت بتتعرض لها طول الوقت ولكن ليس بالضرورة إنك شايفها بوضوح زي الصدمة المتعارف عليها إجتماعيا. مثال: فقد إنسان عزيز سواء عن طريق الخيانة أو عدم الاتفاق المبني على إختلاف القيم أو الموت. وفيه نوع آخر من الصدمة لاندركه ولكن يؤثر فينا تأثير مباشر زي تكرار التعرض لمشاهد العنف والاخبار السيئة وده بيبدأ بمشهد واحد أو خبر واحد وتتوالى الأخبار والصور اللي بتوصلك من كل مكان وتتحول الصدمة إلى تراكمية وتبدأ أعراضها توصل لكل حياتك. 

 

ومن أنواع الاحداث اللي ممكن تخليك تتعرض لصدمات أيضا التعرض لحدث فيه عنف أو تحرش أو ظلم شديد دون القدرة على ردع الظلم ده، التعرض لضغط شديد إضطررت فيه إنك تكتم مشاعرك ونفسك ورغباتك، التعرض لحدث في الماضي جرحك وتخيلت انك عديته ولكنك طول الوقت بتفتكره وبتشوف فلاش باك له وبتحلم بأشخاص كانوا فيه أو أماكن أو علامات ورموز مرتبطة بالنسبة لك بالحدث ده.

ومن الأعراض اللي تخلينا نعرف إننا بنعاني من إضطراب ما بعد الصدمة، أمثلة زي:

- تجنب أحداث أو أشخاص أو أماكن بسبب الاحساس بالخوف والتوتر الشديد  

- صعوبة في النوم

- نوبات غضب شديدة ومفاجئة

- نوبات الانسومنيا والقلق والانتباه الشديد الدائم المستمر واللي بيمنع القدرة على الاسترخاء

-نوبات الفزع وتبدأ بالخضة الزيادة جدا مثلا لما العربية تفرمل فجأة (رد فعل شديد لحدث ميستاهلش خالص) وتنتهى بالحالات الأشد من كده في كل تفاصيلها وده هنتكلم عليه في مقال آخر

- إنك تنفصل تماما عن الواقع أو تحس إن مشاعرك منملة

- الشعور بالخزي وتأنيب الضمير والاعتذار الدائم والمبالغ فيه واللي في غير مكانه

- الافكار الانتحارية

- إحساس دائم بعدم الثقة

- الاحساس بالغربة الدائمة والوحدة الشديدة طول الوقت

- الاكتئاب

- آلام جسدية وتنتج عن أغلبية الأعراض اللي فوق

- مشاعر الحداد الناتجة عن الفقد لما تزيد عن 6 شهور

طبعا فيه مجموعة أكبر من الأعراض وبتكون مرتبطة بمشاكل نفسية أخرى، وهناك أعراض بتدفع بصاحبها مثلا لمرحلة التعاطي بدءا من الافراط المبالغ فيه في السجاير إلى جميع أنواع المخدرات (ونعم الغفراط المبالغ فيه في التدخين درجة من ردجات الادمان والاضطراب العاطفي الناتج عنه أو المؤدي له)

مهم جدا إنك تاخد بالك من الآتي:

ببساطة الأمراض النفسية زيها زي الأمراض العضوية، وسبب رئيسي فيها. يعني مثلا إن أهملت دور برد ولم تقوم بمعالجته، ممكن يقلب بجيوب أنفية أو حساسية مزمنة وكذلك تماما الأمراض النفسية.

من أهم أعراض التوتر العاطفي والعصبي فيما بعد الصدمة هو ببساطة إن مشاعرك وأفكارك بتكون غير متصلة إتصال مباشر بالواقع اللي إنت فيه وفي أغلب الاحوال بتكون لسه متعلقة بمكان الصدمة. ولذا من الضرورة إنك تواجه مشاعرك وتحررها وتحرر نفسك علشان تقدر تواصل حياتك بشكل إنت بتستمتع بيه.

طيب إيه أمثلة لبعض الحاجات اللي قد تجد بعضها يناسبك وممكن تعملها إذا أدركت إنك بتمر بالحالة ديه:

-أولا إنك تقرا عن الموضوع، والقراية في المواضيع ديه زيها زي أما تروح تعمل رياضة في النادي

عشان تخس مثلا، زي ما بتهتم بجسك، يجب كمان تهتم بنفسيتك ده طبعا غير إن المشي والرياضة عموما مفيدة جدا لتحقيق نوع من الارتياح أو التوازن النفسي بشكل عام ونسبي ولكن مش بشكل مطلق.

-إنك تتكلم مع حد متخصص.

-إنك تعمل نوع من النشاط يكون مصدر إنك تخرج الطاقة اللي جواك.

-إنك تقضي وقت مع أشخاص بيسعدوك ويبعثوا فيك الاحساس بالأمان والأمل والايجابية.

-إنك تتبع نظام غذائي يساعد على صحة جسمك البدنية والعقلية زي مثلا الابتعاد عن المنبهات بشكل عام والاكثار من الاكل الصحي قدر الامكان.

طيب لو عندك حد في عيلتك بيعاني من العرض النفسي ده تعمل ايه:

- أولا ماتضغطش عليه إنه يتكلم، سيبه براحته وحاول تبعد عن أي حاجة ممكن تزود من أعراض التوتر اللي عنده.

- إقرا كويس عن الموضوع عشان تبقى بتتعامل بشكل علمي وكل ما قريت كل ما المعرفة زودتك بصبر في التعامل وتأني في ردود الافعال وده مهم جدا في المرحلة ديه.

- خليك متفهم ومتاخدش أي حاجة من تصرفات الشخص اللي قدامك بشكل شخصي، هو حقيقي مايقصدش ولكن الضغط اللي هو فيه بيخلي قدرته على السيطرة على إنفعاله أصعب.

وأخيرا،

- الانتباه الحقيقي لأي حاجة بتعكر صفو حياتنا والعمل باخلاص وجدية على الاهتمام بصحتنا النفسية وبشكل علمي ومستمر وأكيد.

- الإنسان زي الآلة الموسيقية مثلا، الأوتار كلها لازم تكون بتشتغل علشان تعرف تطلع لحن يطربك ويطرب حياتك. 

All content provided on the Mashouraa  and Mashoura-articles blogs are for informational purposes as part of my vision to serve the empowerment of humanity. The owner of these blogs is Ghada Sharif, a British trainer Coach, Mentor and Psychotherapist. All copyrights ©Mashouraa UK 2005. For inquiries and appointments, please email ghadasharif@gmail.com